Хөхний хорт хавдрын үүсэл...
Хөх нь сүү боловсруулах булчирхай (хэлтэнцэр), сүү дамжуулах сувгууд (цоргонцор), эдгээрийг дэмжих өөхөн болон холбогч эдээс бүрддэг нарийн бүтэцтэй эрхтэн юм. Хэлтэнцэр нь сүү ялгаруулах үндсэн үүрэгтэй бол, ялгарсан сүү нь сувгийн сүлжээгээр дамжин хөхний толгойд хүрч, хүүхэд хөхөх үед гадагшилдаг.
Хөхний эд нь олон тэрбум эсээс тогтдог бөгөөд тэдгээр эсүүд биеийн хэрэгцээнд тулгуурлан тогтмол шинэчлэгдэж, нөхөн төлждөг. Энэ үйл явц нь даавар болон эсийн түвшний нарийн зохицуулалтаар явагддаг.
Харин хөхний хорт хавдрын үед дээрх зохицуулалтууд алдагдаж, генийн түвшний гэмтлийн улмаас эсүүд хяналтгүйгээр хуваагдаж эхэлдэг. Ийнхүү хэвийн бус эсүүд нэмэгдэж, эрүүл эдийг шахаж гэмтээдэг бөгөөд улмаар цус болон тунгалгийн замаар биеийн бусад эрхтэнд тархаж болзошгүй байдаг.
Хөхний хорт хавдрын 90 гаруй хувь нь сүү дамжуулах сувгийн доторх эсүүд болон булчирхайн хэсэгт үүсдэг. Хавдрын үүсэлд BRCA1, BRCA2, TP53 зэрэг генийн мутаци, дааврын нөлөө (эстроген, прогестерон), амьдралын хэв маяг (архи, тамхины хэрэглээ, илүүдэл жин, стресс, хөдөлгөөний дутагдал) нөлөөлөх боломжтой гэж Дэлхийн Эрүүл Мэндийн Байгууллага (WHO) онцолсон.
Товчхондоо, хөхний хорт хавдар нь нэг эсийн генийн өөрчлөлтөөс эхэлж, тодорхой үе шаттайгаар хөгжиж, хүндэрдэг өвчин юм. Эдгээр өөрчлөлтээс үүдэн эсүүд хяналтаа алдаж, эрүүл эдийн бүтцийг эвдэж, тархах чадвартай болдог байна.